I går var det klart for seminar nr. to i serien om utvikling av «Regionsentrum Straume kystby».

På seminaret i Fjell rådhus presenterte statsvitar og professor Frank Aarebrot ei fersk innbyggjar- og flyttemotivundersøking i Fjell. Respons har gjennomført undersøkinga på oppdrag frå Fjell kommune.

Professor Frank Aarebrot
Frank Aarebrot

- For Fjell kan det vera fornuftig med differensiert utbygging. Ein slik strategi kan vera ei god «støtpute» for kommunen, sa Aarebrot på seminaret.

Som følgje av den usikre globale økonomien, meiner Aarebrot at det er klokt å ha ei beredskapsplanlegging. Fjell kommune er sårbar ettersom busetnaden i stor grad er basert på einebustader. Ifølgje professoren er det bra å planleggja for vekst, men det er også klokt å laga planar om veksten skulle utebli.

- I økonomiske nedgangstider kan folk verta tvinga til å selja huset sitt med tap, og dette kan få ein negativ dominoeffekt for fjellsamfunnet, sa Aarebrot.

Nær balanse mellom innflytting og utflytting

Han viste til at Fjell kommune har vore dominert av innflytting. Dette har endra seg, og no nærmar ein seg balanse mellom innflytting og utflytting. Han definerte dermed Fjell som ein befolkningsutskiftingskommune. Han tok også opp spørsmålet om korleis straumeområdet kan verta meir attraktivt for innbyggjarane.

- Eg trur ikkje Fjell kan konkurrera med Bergen når det gjeld natteliv. Kvifor ikkje heller prioritera ettermiddagslivet med godt tilbod på familierestaurantar og folkeleg kulturtilbod? Med moderne teknologi kan det til dømes skapast eit godt kinotilbod med tre - fire mindre salar her ute, sa professoren.

Undersøkinga viser mellom anna at dei fleste innbyggjarane er svært godt nøgde med å bu i Fjell (66 prosent). Dei er godt nøgde med bustaden, naboskapet, tilgang til forretningar og oppvekstvilkår. Dei er minst nøgde med utelivstilbodet.

Det er i hovedsak unge folk som flyttar ut av Fjell. 68 prosent av dei som har flytta til Fjell har flytta frå Bergen. Grunnen til at dei flyttar til Fjell er først og fremst tilgang på bustad og tomt og oppvekstvilkåra. Den viktigaste årsaka til flytting internt i kommunen, er behov for annan type bustad.

Mange hadde møtt opp på seminaret
Frå seminaret i Fjell rådhus

Straume som regionsenter

Plansjef i Hordaland fylkeskommune, Marit Rødseth, presenterte Fylkesdelplan for senterstruktur og lokalsiering av service og handel (2002). Straume er peika ut som eitt av åtte regionsenter i fylket. Rødseth viste til at Straume er eit reiseknytepunkt og at det også er innpendling mot Straume. Senteret trekkjer til seg folk både frå Bergen og dei andre nabokommunane.

Ho lista opp ulike utfordringar for samaordna areal og transportplanlegging

• Sjølvforsynt regionsenter
• Balanse mellom arbeidsplassar og bustader
• Fortetting med kvalitet
• Kollektivtransport
• Gode møteplassar
• Veg

Utbygging rundt Damsgårdssundet

Seniorrådgjevar Bente Florelius i Bergen kommune presenterte planarbeidet som ligg bak den omfattande utbygginga rundt Damsgårdssundet i Bergen, «Ny energi rundt Damsgårdssundet 2007-2012".

Ho synte til at det hadde vore eit omfattande samarbeid mellom ei rekkje aktørar. Det vart lagt vekt på eit godt samarbeid med skule, velforeiningar og andre lokale aktørar.


Tekst og foto: Vigleik Brekke