Hildegunn Eide var den første i Fjell som tok fagbrev i reinhald. Dette skjedde i 1999. No er ho soneleiar i reinhaldtenesta hjå Eigedomssjefen. I dag er det om lag 100 reinhaldarar (62 årsverk) i Fjell. I tillegg til dei to soneleiarane har 17 av dei tilsette fagbrev med fullført teori- og praksiseksamen.

Utover dette vil sju nye medarbeidarar få på plass både teori- og svenneprøve i 2012. Dermed har kompetansen stadig auka hjå dei tilsette i renhaldtenesta dei siste åra.

 Hildegunn Eide
 Hildegunn Eide

- I desember var det fleire som avla teoriprøve etter å ha gjennomgått kursopplegget til Lilleborg i regi av opplæringskontoret i Hordaland fylkeskommune. I tillegg til teoriprøve må lærlingane ha praksis i fem år i full stilling og avleggja ein praktisk svenneprøve over to dagar, seier Hildegunn Eide.

Vonar at halvparten tek fagbrev

Teorikurset er på 60 timar og går over eitt år og vert avslutta med heildagseksamen. Reinhaldsleiar Ruth Paulson er glad for at mange av reinhaldarane har fagbrev. Målet er at halvparten av medarbeidarane får denne formelle fagkompetansen.

- Det er også mogleg å ta helse og miljø på vidaregåande skule med teori i to år og to år som lærling. Men i vår samanheng er det ordninga med fem års praksis og teorikurs som er mest vanleg, seier Ruth Paulson.

God opplæring

Gabi Giurgiucanu (43) var ein av dei som avla teoriprøve i desember. Giurgiucanu kjem frå byen Iasi nord i Romania og kom til Noreg i 2002. Han har funne seg godt til rette i Fjell saman med familien og trivst godt som tilsett i reinhaldtenesta hjå Eigedomssjefen. Han har ansvar for reinhald på Hjelteryggen skule og Marihøna barnehage.

- Eg har tilstrekkeleg med praksis og tek sikte på å ta svenneprøven i 2012. Eg har lært svaært mykje i teorikurset og fått god opplæring i korleis eg skal bruka utstyret, kjemikalier og metodar.

 Gabi Giurgiucanu
Gabi Giurgiucanu

I reinhaldtenesta er 21 ulike nasjonar representert. For ein del av dei tilsette med utanlandsk bakgrunn er språket ei utfordring.

- Gjennom opplæringa har eg også lært meir norsk. Det går greitt å lesa norsk, men det er meir utfordrande å skriva norsk. Og eg må vedgå at det er litt enklare å læra bokmål enn nynorsk, seier Gabi Giurgiucanu.

Omfattande teoretisk opplæring

Det er eit omfattande teoripensum på ni bøker med yrkeslitteratur elevane skal gå gjennom. Det handlar mellom anna om bedriftskunnskap og miljø, planlegging, mikrobiologi, metodar, utstyr og maskinar.

Sitjande framme frå venstre: Anne Britt Ulveseth, Karin Olsen, Eli Ulveseth, Lidija Kljaic og Jamal Kassab.
Sitjande framme frå venstre: Anne Britt Ulveseth, Karin Olsen, Eli Ulveseth, Lidija Kljaic og Jamal Kassab.
Ståande bak frå venstre: Cristina Giurgiucanu, Gurid Torbjørnsen, Sølvi Nikolaisen, Jasna Kljaic, Heidi Hjartøy, Milena Brkic, Marilyn Sekkingstad og Hildegunn Eide.

- Med denne teoretiske kunnskapen vert reinhaldarane oppdaterte i nye arbeidsmetodar og utrusta til å gjera ein endå betre jobb. Dessutan får dei også høgare løn, seier Ruth Paulson.

Hildegunn Eide har eit særleg ansvar for å følgja opp dei sjukmelde. Fjell kommune er med i Hordalandprosjektet i regi av KS. Reinhaldtenesta har også eit godt samarbeid med Vaksenopplæringa.

- Ein del av dei tislette har muskel- og skjelettplager og treng god oppfølging. Som arbeidsgjevar har vi oppfølgingssamtalar med sikte på å redusera sjukefråværet. Vi satsar på gode møteplassar. Det er oppretta verneombod i alle dei fem sonane, og det er sonesamlingar to gonger kvar halvår, seier Hildegunn Eide.


Tekst og foto: Vigleik Brekke