Kommunane Askøy, Fjell, Sund og Øygarden får til saman 49 millionar kroner i samhandlingsmidlar i 2012. Fjell kommune får åleine 17,8 millionar kroner neste år. Den samla veksten i dei frie inntektene for kommunane neste år vert om lag fire milliardar kroner.
Rådmann Steinar Nesse og ordførar Eli Årdal Berland tok imot statsråd Liv Signe Navarsete
Rådmann Steinar Nesse og ordførar Eli Årdal Berland tok imot statsråd Liv Signe Navarsete
- Midlane vert fordelte gjennom inntektssystemet etter alderssamansetjinga i befolkninga. Mange kommunar er godt i gang med samhandling, og her i Fjell og nabokommunane er de i forkant ved å gje behandling før pasientane er utskrivingsklare, sa kommunal- og regionalminister Liv Signe Navarsete då ho valde å leggja fram kommuneproposisjonen for 2012 i Fjell.
Frå og med neste år vert det innført kommunal medfinansiering av spesialisthelsetenesta og kommunalt betalingsansvar for utskrivingsklare pasientar, skriv kommunal- og regionaldepartementet i ei pressemelding.
Omvisning
I forkant av presentasjonen av det økonomiske opplegget for kommunane neste år, var det omvisning i det nye Øyane distriktspsykiatriske senter (Øyane DPS), Straume terapisenter og intermediær avdeling på Straume.
Frå omvisninga. Frå venstre: prosjektleiar Eirik Milde, Eli Årdal Berland, Liv Signe Navarsete, Steinar Nesse og klnikkdirektør psykiatrisk divisjon Helse Bergen, Hans Olav Instefjord
Frå omvisninga på det nye Øyane DPS. Frå venstre: prosjektleiar Eirik Milde, Eli Årdal Berland, Liv Signe Navarsete, Steinar Nesse og klinikkdirektør psykiatrisk divisjon Helse Bergen, Hans Olav Instefjord
- Eg vil gje ros til Helse Bergen og kommunane her ute. Andre har noko å læra her. Mykje er bygd opp med eigne midlar, og dette vert gjort fordi de ser at dette gjev gode tilbod for innbyggjarane, sa Navarsete under presentasjonen i kultursalen.
Samhandlingsprosjekt i region vest
Saman med Helse Bergen og nabokommunane Askøy, Sund og Øygarden i region vest, har Fjell utvikla fleire samhandlingsprosjekt. Dette gjeld mellom anna intermediær avdeling på Straume som er eit pilotprosjekt til eit nytt lokalmedisinsk senter på Straume og ei palliativ avdeling (lindrande behandling) lokalisert på Kleppestø på Askøy. I januar var det oppstart av JordmorHeim-prosjektet i Fjell (Helse Bergen og Fjell kommune).
Andre samarbeidsprosjekt med Helse Bergen er dialysesatellitten på Straume og Øyane distriktspsykiatriske senter (Øyane DPS) på Straume. I desse prosjekta er Fjell kommune huseigar, medan Helse Bergen står for drifta.
Tekst: Vigleik Brekke
Foto : Atle Justad/Vigleik Brekke
