Torsdag 1. september har kommunestyret det siste møtet i denne kommunevalperioden. På sakslista er det ei rekkje saker som har vore til behandling i formannskapet og komitéane i sist veke.

Store investeringar i vatn- og avlaupsanlegg

I framlegget til kommunedelplan for vassforsyning og avlaup/vassmiljø 2011-2022 er det lista opp tiltak for totalt 900 millionar kroner. Planen er no klar for endeleg godkjenning i kommunestyret etter offentleg høyring og innstilling frå formannskapet. I høyringsperioden i sommar kom det inn vel 20 fråsegner.

I forslaget til handlingsprogrammet er det sett opp tiltak for 416 millionar kroner til vassforsyning og 484 millionar kroner til avlaup og vassmiljø. Dersom dei omfattande investeringane vert gjennomførte, vil årsgebyra for vatn og avlup aukast vesentleg.

Utgreiing av framtidig brannvernorganisering

Kommunestyret skal gjera endeleg vedtak i saka om brannvernsamarbeid mellom Fjell, Sund og Bergen. Fleirtalet i formannskapet i Fjell og kommunestyret i Sund ønskjer å vidareføra organiseringa slik ho er i dag. Saka vert lagt fram etter at utgreiinga om brannvernsamarbeid har lege ute til offentleg høyring i 45 dagar i juni/juli. Det kom inn 12 høyringsfråsegner.

Planprogram for plan for Bildøyna

Det føreligg endeleg planprogram for kommunedelplan og områderegulering for Bildøyna 2011-2023. Planprogrammet vart først lagt ut til offentleg ettersyn i 2009, men etter vesentlege merknader frå Fylkesmannen, vart det lagt utarbeidd eit nytt planprogram som har lege ute til ettersyn i 2011. Det kom inn 16 merknader til planen, men ingen av merknader gjeld sjølve utforminga og innhaldet i planprogrammet.

Kommunestyret skal ta stilling til planprogram for plan for Bildøyna
Kommunestyret skal ta stilling til planprogram for planar for Bildøyna

Politisk organisering

Etter vedtak i formannskapet i juni, har rådmannen lagt fram ei evaluering av den politiske organiseringa og forslag til endringar. Konkret vart rådmannen bedt om å evaluera komitéar og formannskap.

Det er presentert fleire forslag til endringar. Mellom anna er det framlegg om å slå saman komité for drift og komité for finans og forvaltning til eín komité. Det er også forslag om at formannskapet skal ha 11 faste medlemer. I dag har formannskapet ni medlemer utvida med gruppeleiarar som i utgangspunktet ikkje sit i formannskapet. Ordninga i dag inneber også at grupper i kommunestyret som har fem eller fleire representantar i kommunestyret, kan stilla med to medlemer i formannskapet.

Formannskapet drøfta saka på møtet 22. august og tok rådmannen sine synspunkt til orientering.

Andre saker i kommunestyret 1. september

• Sjølvskuldnargaranti for lån teke opp av Fjell Bustadstifting.
• Nye vedtekter for kommunale barnehagar. 
• Fullmakt til ordføraren i perioden 1. september til nytt politisk styre er konstituert.
• Orientering om omdømeprosjektet med innbyggjarundersøking.

Tekst: Vigleik Brekke