Innan 1. mars skal konsulent Magne Eikanger (Brannvern- og beredskapsrådgiver 1) leggja fram si utgreiing om framtidig brannvern på Sotra. Utgreiinga omtalar mellom anna eit utvida brannvernsamarbeid mellom Fjell, Sund og Bergen.

Konsulent Magne Eikanger har gjeve informasjon om utgreiingsarbeidet til kommunestyra i Sund og Fjell. Biletet er frå kommunestyremøtet i Fjell 25.10.
Konsulent Magne Eikanger har gjeve informasjon om utgreiingsarbeidet til kommunestyra i Sund og Fjell.  Biletet er frå kommunestyremøtet i Fjell 25.10.

Den siste tida har konsulenten og styringsgruppa særleg arbeidd med spørsmålet om beredskapen for området Straume og Knarrvika er i samsvar med forskriftene. Det er krav om ei innsatstid på maksimalt 10 minutt til Sartor Storsenter og helseinstitusjonane på Straume. Det har vore korrespondanse med Direktoratet for samfunnssikkerhet og beredskap (DSB)om dette spørsmålet. DSB har også hatt møte med styringsgruppa. Direktoratet konkluderer med at det er opp til kommunane å finna ei løysing som tilfredsstiller krava som er gjeve i dimensjoneringsforskrifta. Forskrifta opnar for at det kan gjennomførast tiltak for å kompensera eventuelt lengre innsatstid enn 10 minutt. DSB vil ikkje krevja at det vert bygt brannstasjon på Straume dersom kommunen konkluderer med at beredskapen er i samsvar med forskriftene.

- Akseptabel innsatstid

I dag har Fjell og Sund kommunar ein sløkkjeavtale med Bergen som omfattar Bjorøyna, Tyssøyna, Litlesotra, Bildøyna og delar av Storesotra (Lie, Kolltveittunnelen og strekninga Lie-Ekerhovd). Denne avtalen kostar Sotra Brannvern om lag 1,9 millionar kroner i året.

- Når eg har vurdert brannberedskapen for Straume og Knarrvika, er min konklusjon at både Sartor Storsenter og helseområdet på Straume er dekt innanfor kravet til innsatstida i forskriftene, seier konsulent Magne Eikanger.

I tillegg til kravet om innsatstid på 10 minutt for tettbygde område med særleg fare for rask og omfattande brannspreiing og helseinstitusjonar, er det eit generelt krav om maksimal innsatstid på 20 minutt for tettstader. Utanom tettstader bør ikkje innsatstida overstiga 30 minutt..

- Etter forskrifta har ein krav på hjelp frå den brannstasjonen som kan vera raskast på brann- eller skadestaden. På bakgrunn av dette bør ein etter mitt syn sjå bort frå kommunegrenser når ein skal avgjera kvar ein brannstasjon skal lokaliserast, seier Eikanger.

Utgreiar fleire alternativ

Styringsgruppa og konsulenten presenterer og vurderer fleire alternativ til brannvernsamarbeid. Dei alternativa som vert vurderte i rapporten er:

- Vidareføring av samarbeidsavtalen med Bergen kommune (Bergen
  Brannvesen).
- Forsterka beredskap på Ågotnes brannstasjon.
- Utbygging av ny brannstasjon på Straume.
- To-trinnsmodell, beredskapsløysing for Straume. Første vert det
  etablert dagkasernert vaktordning på Straume. Trinn to er å byggja
  ein ordinær brannstasjon på Straume. Brannstasjonen på Ågotnes
  har heimevaktordning.
- Nye regionale løysingar. I dette alternativet skal ein avgrensa
  modellen til å gjelda Fjell, Sund og Bergen kommunar. Konsulenten
  vil likevel peika på fordelar og ulemper ved eit meir omfattande
  brannvernsamarbeid enn dei tre kommunane som er med i
  prosjektet.

I utgreiinga skal konsulenten også gjera greie for beredskapsmessige, økonomiske og faglege konsekvensar ved kvart av dei fem alternativa og korleis eit eventuelt felles brannvesen skal driftast. Det vert også ein presentasjon av ulike selskapsmodellar. Utgreiinga vert avslutta med tilråding frå konsulenten.

Det er Sund-ordførar, Ove Bernt Trellevik, som leiar styringsgruppa.

- Utgreiinga så langt syner at ein del alternativ ikkje er så aktuelle lenger. Difor vil eg på neste møte i styringsgruppa føreslå at vi "spissar" alternativa, seier Trellevik.

Prosessen vidare

Styringsgruppa har så langt hatt fire møte. Dei to siste møta vert haldne i januar og februar før rapporten ligg på bordet til 01.03.

I tillegg til leiar Ove Bernt Trellevik, er styringsgruppa samansett av Nina Glesnes, Jenny G. Fjell, Kjartan Algrøy, Lars Oskar Lie, Leif Ove Reithaug, Svein Olav Drageland, Roy-Erik Hansen og Gerhard Inge Storebø. Observatørar er Bjørn Olav Paulsen, Helge Eidsnes, Lasse Westby og Vigleik Brekke. I tillegg til styringsgruppa har arbeidsgrupper med deltakarar frå Sotra brannvern og Bergen brannvesen vore i arbeid i prosjektperioden.

Det er kommunestyra i Fjell og Sund som har bede om utgreiinga, og det er til sist kommunestyra som gjer endeleg vedtak om framtidig brannvern på Sotra.

 Tekst og foto: Vigleik Brekke