Dersom alt går etter planen kan eit nytt lokalmedisinsk senter på Straume stå klar til bruk i 2015. Rådmannen tilrår kommunestyret å godkjenna eit plangrunnlag og at det vert engasjert arkitekt for å utforma eit skisseprosjekt. Saka skal først opp i komité for finans og forvaltning tysdag 17. januar.
Det nye senteret er planlagt plassert i området mellom Straume terapisenter og Øyane DPS
Dette senteret er ei fullføring av samhandlingsprosjektet "Betre saman". Helse Bergen og kommunane Askøy, Fjell, Sund og Øygarden har allereie etablert intermediær avdeling på Straume med seks senger som eit pilotprosjekt til det lokalmedisinske senteret. Alle kommunane har gjeve eit mandat til ei prosjektgruppe som skal følgja opp pilotprosjektet og planleggja innhald og organisering av eit lokalmedisinsk senter på Straume.
Det nye senteret vil innehalda ei rekkje funksjonar. Aktuelle funksjonar er 10 senger til restbehandling av pasientar overførte frå sjukehus, to-tre observasjonssenger, 10 rehabiliteringssenger og 16 dagplassar til rehabilitering. Det er også aktuelt å gje plass til eit frisklivs- og meisteringssenter, dialysesatellitt, 20 sjukeheimsplassar (Fjell kommune), legesenter og den interkommunale legevakta for Sund og Fjell. Det er ikkje avklart om det vert etablert røntgenteneste og bynær fødestove i senteret.
Andre saker i komité for finans og forvaltning 17. januar
- Oreigning for gjennomføring av reguleringsplan, Haganes
- Samhandlingsreforma, lovpålagte avtalar mellom kommunar og helseføretak
- Grunnlagsdokument for samarbeid mellom aktørar i samhandlingsreforma
- Opretting av barnehageutval
- Oppretting av arbeidsgruppe for ny skulestruktur
- Høyring av framlegg til tilskot og foreldrebetaling i ikkje-kommunale barnehagar
- Folkevaldopplæring i 2012
Her kan du lesa innkalling og saksdokument.
Tekst og foto: Vigleik Brekke
