Komande torsdag (27.10.) skal kommunestyret i Fjell ta stilling til det endelege utvida planprogrammet for Sotrasambandet. Planprogrammet slår fast kva alternativ som skal utgreiast vidare. Arbeidet er delt opp i to sjølvstendige kommunedelplanar; eín for strekninga Kolltveit - Storavatnet og eín for strekninga Storavatnet - Liavatnet.

Sotrasambandet

Både Fjell og Bergen kommunar har vedteke å slutta seg til prinsippet om at arbeidet skal delast i to planar. Planen har lege ute til offentleg ettersyn i ti veker i sommar, og det har kome inn ni merkander til planen. På bakgrunn av merknadene vil Statens vegvesen utgreia to nye alternativ for ny tunnel mellom Storavatnet og Liavatnet. Formannskapet gjekk 17.10. inn for å godkjenna planprogrammet.

Formannskapet føreslår at forhandlingsutvalet skal vera samansett av Eli Årdal Berland (H), Marianne S. Bjorøy (Ap) og Odd Bjarne Skogestad (KrF).

Felles regionpakke for bergensområdet

Kommunestyret skal også gje uttale til konseptvalutgreiing (KVU) for transportsystemet i bergensområdet. Analysane konkluderer med at det er nødvendig med reguleringar av trafikken og å få fleire til å reisa kollektivt. I formannskapet vart det tilrådd at Fjell kommune skal sjå positivt på å tenkja regionalt om samferdslespørsmål og på sikt å utvikla ein felles regionpakke.

Likevel vert det i innstillinga frå formannskapet understreka at Sotrasambandet må sjåast som eit eige prosjekt og ikkje som ein del av regionpakken for bergensområdet. I forslaget til fråsegn heiter det også at bompengar skal primært nyttast til realisering av Sotrasambandet og at Fjell kommune er positiv til utvikling av bybane til Storavatnet. Vidare planlegging av Sotrasambandet må leggja til rette for framtidig bybane til Straume.

Plan for Eide

Det ligg føre planprogram for kommunedelplan for Eide. Det vert lagt opp til ein prosess som klargjer om næringsområdet kan utvidast og kva næring som kan etablerast på Eide, mellom anna vindkraft. Planen har lege ute til offentleg høyring i ti veker i sommar, og det har kome inn 24 merknader til planen. Formannskapet føreslår at varaordførar Odd Bjarne Skogestad vert saksordførar for kommunedelplanen.

Val

På kommunestyret skal det også veljast medlemer og representantar til fleire nemnder, råd og utval.

Kommunestyret tek til klokka 17.00. Her kan du lesa innkalling med saksdokument.

Tekst: Vigleik Brekke