Formannskapet vedtok i går å leggja fire forslag til 2012-budsjett ut til offentleg høyring. I tillegg til fleirtalskonstellasjonen (Høgre, FrP og KrF), la Arbeiderpartiet, Sotralista og Venstre fram forslag til budsjett for 2012 og økonomiplan 2012-2015. Kommunestyret gjer endeleg vedtak 15. desember.
I forhold til rådmannen sitt framlegg, styrkar Arbeiderpartiet driftsbudsjettet med 700 tusen kroner ved å leggja inn 350 tusen kroner til frukt og grønt på ungdomsskulen og 350 tusen kroner til praksisnær undervisning/realfagssatsing. Ekstrautgiftene vert dekka inn ved å redusera frikjøp til godtgjering til politikarar. På investeringsbudsjettet vil Arbeidarpartiet setja av 500 tusen kroner i fire år til trafikksikring på strekninga Solsvik - Landro.
Sotralista styrkar driftsbudsjettet med 7,4 millionar kroner. Mellom anna skal ingen stillingar i helse og omsorg stå vakante (+ to millionar kroner). Tidleg innsats i skulane (spesialpedagogikk) skal styrkast med eín million kroner. Sotralista vil mellom anna styrka tilskotsordningane innan kultur, fritid og idrett med eín million kroner. Styrkinga av budsjettet vert finansert med auka skatteinntekter og renteinntekter. Sotralista aukar investeringsbudsjettet med 29 millionar kroner i 2012. Den største einskildsummen er rehabiliteringsavdeling/sjukeheimsplassar med 10 millionar kroner.
Venstre aukar driftsbudsjettet med 2,6 millionar kroner. Fordelinga av midlane vert gjort i samarbeid med rådmannen og andre parti som vil støtta forslaget. Partiet har sett av 1,4 millionar kroner ekstra til trafikksikringstiltak (busskur/veglys) og eín million kroner til ekstra nedbetaling av lån. Venstre vil finansiera påplussingane med eigedomsskatt på verk og bruk og reduksjon av politikarløn.
Fleirtalskonstellasjonen fremja det same forslaget som vart presentert i komité for finans og forvaltning 15. desember. Høgre, FrP og KrF vil auka driftsbudsjettet med vel to millionar kroner.
Her kan du lesa alle dei fire forslaga komplett:
Planprogram for bustadutvikling
Marianne Sandahl Bjorøy (ap) er valt til saksordførar for kommunedelplan for bustadutvikling 2013-2020. Formannskapet godkjente i går at framlegg til planprogram for kommunedelplanen vert lagt ut til offentleg ettersyn. Med ni mot to røyster (FrP) vart det vedteke at formannskapet skal vera styringsgruppe for kommunedelplanen.
Planprogrammet gjer i korte trekk greie for føremålet med planarbeidet, utviklingstrekk, planprosessen og opplegg for medverknad. Fjell kommune står framfor dei største og mest omfattande utbyggingsplanane nokon sinne. Det er difor behov for eit oppdatert planverk om dette. Plan- og bygningslova krev at det skal lagast planprogram for alle kommunedelplanar. Planen vert lagt ut til offentleg ettersyn i åtte veker.
Positiv til handtering og lagring av lågradioaktivt avfall
Formannskapet går inn for at Coast Center Base AS får løyve til å lagra og handtera lågradioaktivt avfall på Ågotnes. CCB har handtert denne typen avfall sidan 1988, og frå 2006 har selskapet hatt løyve til mottak, descaling og mellomlagring. Formannskapet legg til grunn at det vert gjennomført prøvetaking av grunnsediment ved hovudinnløp i sjø kvart år. Det er Statens strålevern som tek endeleg stilling til søknaden.
Reguleringsplan for kollektivfelt mellom Straume og Knarrvika
Formannskapet går inn for å godkjenna framlegg til reguleringsplan for sambruksfelt på riksveg 555 mellom Straume og Knarrvika. Det vert lagt til rette for utviding av riksveg 555 frå to til fire felt der dei to nye felta er reservert for kollektivtrafikk.
Riksveg 555 i dag
Riksveg 555 i dag
Planen har lege ute til offentleg ettersyn. På bakgrunn av merknadene er det gjort nokre endringar og justeringar i planen. Den største endringa er at ny innfartsparkering på den såkalla "McDonald-tomta" vert teken ut av planen. Sotralista og Venstre røysta imot at innfartsparkering inklusive tilkomst og austre rundkjøring vert teken ut av planen. Kommunestyret gjer endeleg vedtak.
Høyringsuttale til forskrifter for Bergen og Omland havnevesen (BOH)
Formannskapet godkjente endringar i lokale forskrifter for BOH. Det er innført nytt system for avgifter og vederlag etter at den nye hamne- og farvasslova vart gjeldande frå 2009.
Tekst: Vigleik Brekke
