Komité for plan og utvikling (KPU) skal tysdag 8. november ha sitt første møte i den nye kommunevalperioden. På sakskartet er det fleire reguleringsplansaker og klagesaker.
Plan for Coast Center Base, Ågotnes
Dette er ein plan som omfattar nærare 890 dekar for nærings- og industriareal og hamneområde på land og i sjø. Innkomne merknader gjeld mellom anna utfylling i Kvernavatnet. Planen er no til sluttbehandling, og rådmannen føreslår at planen vert godkjent. Kommunestyret tek endeleg avgjerd.
Skråfoto over Ågotnes
Skråfoto over Ågotnes
Plan for Tona Sør, Valen
Denne planen legg til rette for 28 husvære med fellesareal og leikeplassar. Etter motsegn frå Fylkesmannen er planen endra på vesentlege punkt. Det reviderte framlegget har lege ute til nytt offentleg ettersyn. Også denne planen er klar for sluttbehandling. Kommunestyret tek endeleg avgjerd.
Plan for Hesthagen, Brattholmen
Det vert i dette planframlegget lagt til rette for oppføring av sju bustader i felt som konsentrert/spreidd småhusbusetnad. Etter motsegn frå Fylkesmannen, er planen endra på vesentlege punkt og har lege ute til nytt offentleg ettersyn. Det er gjort nokre mindre endringar i føresegnene. Kommunestyret tek endeleg avgjerd til planen som no er til sluttbehandling.
Utbetring av fylkesveg 206
Denne reguleringsplanen legg til rette for opprusting av eksisterande veg mellom Bildøybakken og Døsje med fortau og utbetring av kryss mellom fylkesveg 206 og fylkesveg 258. Den aktuelle strekninga er på 1,1 kilometer, og vegen er planlagt for ein breidde på 5,75 meter og fortau med ein breidde på 2,5 meter.
Plan for småbåthamn i Haganesvika
Det ligg føre framlegg til ein detaljreguleringsplan for småbåthamn i Haganesvika. Planen gjeld tre nye naust, småbåthamn for om lag 80 båtar, molo, kai, flytebryggjer og bølgjebrytar. Rådmannen går inn for at planen med nokre endringar vert lagt ut til offentleg ettersyn.
Klage på vedtak om retting og tvangsmulkt
Fylkesmannen har klaga eit vedtak i KPU 30. august. Klagen gjeld eit tiltak på Ekren der utbyggjar utan søknad og løyve planerte ut eit område på om lag 90 kvadratmeter. Administrasjonen vedtok pålegg om fjerning og tvangsmulkt. Etter klage frå tiltakshavar konkluderte KPU i august med at dette var eit ulovleg tiltak som kunne reknast å vera mindre vesentleg ("av mindre betydning") og at vedtaket om retting og tvangsmulkt skulle opphevast.
Fylkesmannen meiner at muren og planeringa gjekk langt ut over kva som er av "mindre betydning" og at kommunen har plikt til å følgja opp lovbrotet. Dersom klagen frå Fylkesmannen ikkje vert teken til følgje, vert han vidaresendt til setjefylkesmann.
Krav om sikring av skjering
Rådmannen går inn for at Husbyggernes Innkjøpskontor (HI) vert pålagt å sikra ei fjellskjering ved ein bustad på Fjell. Det er innstilt på at skjeringa vert sikra med korrosjonsverna steinsprangnett. Frist for utføring av tiltaket er sett til tre månader. HI er også tidlegare pålagt å sikra fjellskjeringa.
Til møtet i KPU komande tysdag ligg det føre sju andre klagesaker, førespurnad om regulering til bustadføremål på Tveit og søknad om reguleringsendring for del av plan for Skorane, Vindenes.
Her er innkalling med saksdokument til møtet i KPU.
Tekst: Vigleik Brekke
