Formannskapet skal i dag (20.06.) ta stilling planar og vass- og avlaupsutbygging på kort og lang sikt.

Utbyggingsbehov på 900 millionar kroner

Det ligg føre framlegg til kommunedelplan for vassforsyning og avlaup/vassmiljø 2011-2022. Rådmannen tilrår at framlegget vert lagt ut til offentleg ettersyn til 11. august. I forslag til tiltaksdel i planen er det sett opp prosjekt til 416 millionar kroner for vassforsyning og 484 millionar kroner for avlaup og vassmiljø. For å sikra nok drikkevatn er det føresått å auka kapasiteten i nytt vassreinseanlegg i Bildøybakken og å ta i bruk Kørelen som vasskjelde. Det er også forslag om nye avlaupsanlegg på Knarrevik, Våge og Ågotnes.

Kortsiktige tiltak

Sjølv om det no vert lagt fram kommunedelplan for vassforsyning og avlaup, har styret i FjellVar konkludert med at det er rett å setja i verk tiltak straks for å auka kapasiteten på avlaup i straumeområdet. Selskapet ønskjer også laga forprosjekt for nytt vassbehandlingsanlegg ved Bildøyvatnet. Rådmannen støttar forslaga til strakstiltak og at det vert sett i gang eit forprosjekt av tiltak for å auka avlaupskapasiteten i straumeområdet og vassbehandlingsanlegg ved Bildøyvatnet.

Kommunedelplan på Eide

Rådmannen føreslår at framlegg til planprogram for kommunedelplan med konsekvensutgreiing for Eide vert lagt ut til offentleg ettersyn. Våren 2010 presenterte Marin Eide AS og Vestavind Kraft AS planar om ein energipark med hamn kombinert med eit allsidig næringsområde på Eide. I planarbeidet skal ein drøfta omfang og visa aktuelle hovudløysingar for eit utvida nærings- og industriområde med vindmøllepark på Eide.

Møtet tek til klokka 15.00 og vert halde i komitésalen. Her kan du lesa innkalling og saksdokument.