Både komité for drift (KD) og komité for finans og forvaltning (KFF) gjekk tysdag kveld (07.06.) samrøystes inn for å godkjenna skisseprosjektet for ny fleirbrukshall på Straume med tre speleflater.

Dette alternativet er kostnadsrekna til mellom 165 og 175 millionar kroner. Den årlege driftskostnaden (kapitalkostnader, forvaltning og drift) er rekna til 11-12 millionar kroner.

Situasjonsplan tre speleflater
Situasjonsplan tre speleflater

Brutto investeringskostnad er altså 175 millionar kroner. Til frådrag går momsrefusjon på 35 millionar kroner, salssum for tomt og klubblokale til Danielsen skule på 10 millionar kroner og spelemidlar på 17 millionar kroner. Netto prosjektkostnad vert etter dette mellom 105 og 113 millionar kroner. Det vert også arbeidd med å få private aktørar til å forskottera delar av lånebehovet i nokre år. I investeringsbudsjettet er det sett av 100 millionar kroner til ny fleirbrukshall i perioden 2011 – 2014. Det er venta at hallen vil stå klar til bruk våren 2013.

Saka går vidare til endeleg avgjerd i kommunestyret 16. juni.

Innsparing på 17 mill. i 2011

Komité for drift (KD) og komité for finans og forvaltning (KFF) handsama kvar for seg økonomirapport 1. tertial 2011.

KD gjekk samrøystes inn for eit forslag frå fleirtalskonstellasjonen (FrP, Høgre og KrF) om å støtta rådmannen sitt forslag om ei innsparing på om lag 17 millionar kroner. Men rådmannen sitt forslag om å ta vekk midlar til leirskule for skuleåret 2011/2012 vert teke inn igjen i budsjettet. I KFF fekk dette forslaget ni røyster. Arbeidarpartiet sine to medlemer i komitéen røysta imot.

Dersom ein legg saman underskotet i vedteke budsjett for 2011 på 14,2 millionar kroner og korrigerer dette for forventa meirutgifter og mindreinntekter, vil kommunen stå igjen med eit salderingsbehov på 27,7 millionar kroner. Med denne innstillinga frå KFF er 17 millionar kroner av salderingsbehovet henta inn dette året. I innstillinga heiter det at det negative netto driftsresultatet på om lag 10,7 millionar kroner vert dekka av disposisjonsfondet.

Denne saka går vidare til endeleg avgjerd i kommunestyret 16. juni. Ordførar Eli Årdal Berland opplyste i komité for drift at gruppeleiarane vert kalla inn til møte i forkant av kommunestyret med sikte på brei semje i denne saka.

Sal av klubbhus og tomteareal

KFF går samrøystes inn for å godkjenna ein kjøpekontrakt mellom Fjell kommune, Straume Idrettspark AS og stiftinga Egill Danielsen om tomt og klubblokale på Straume. Verdien på eigedomstransaksjonen er 20 millionar kroner. I saksutgreiinga skriv rådmannen at partane har kome fram til ein balansert avtale som sikrar alle partane sine interesser. Avtalen fører til at Danielsen skule sikrar sitt behov for snarleg utviding av barnesteget, Straume Idrettspark AS får tilført kapital ved salet og Fjell kommune kan i større grad styra utvidinga av det private skuletilbodet gjennom det privatrettslege avtalen. Skuletilbodet vert gradvis utvida til maksimalt 175 elevar, dvs. eín klasse pr. alderssteg.

Andre saker i komité for drift (KD) og komité for finans og forvaltning (KFF)

Komité for drift:

- Komitéen vedtok planprogram for kommunedelplan for idrett
  og fysisk aktivitet slik det låg føre.

- KD innstiller overfor kommunestyret å godkjenna framlegget til
  høyringsutkast for kommunedelplan for idrett og fysisk aktivitet.-

- Framlegg til planprogram for kommunedelplan for trafikksikring
  2011-2015/2020 vert lagt ut til offentleg ettersyn i 12 veker.

- Danielsen skule fekk avslag på sin søknad om å få dekka
  kostnadene med drift av SFO.

- Det vart oppretta oppretta kommunekomité for TV-aksjonen 2011.
  Komitéen vert samansett slik: Leiar Vidar Arnesen, sekretær frå Fjell
  Frivilligsentral, ressurspersonar vert Gunnar Hannisdal, Odd Bjarne
  Skogestad og Gro Heidi Skoge. Inntektene går i år til Norsk
  Folkehjelp.

Komité for finans og forvaltning

- KFF godkjente årsmelding og rekneskap for 2011.

- Søknad om dekking av sakskostnader for Hans Gunnar Våge knytt til
  sal av grunn, vart avslått.

- Spar Ågotnes torg får salsløyve for alkohol.

- Komitéen slutta seg til utkast til forskrift om bruk av vannscooter,
  men ønskjer opning for lokal tilpassing og fleksibilitet.

- Komitéen slutta seg til rådmannen sitt utkast til uttale på høyring
  NOU 2010:13: Arbeid for helse.

Møtebok vert om kort tid lagt ut på heimesida til Fjell kommune under Politikk - Politiske komitéar.


Tekst: Vigleik Brekke