Komité for drift skal på tysdag 09.11 dela ut ei rekkje tilskot og stipend. Det er åleine sett av 400 tusen kroner til tilskot til private kulturbygg. Halvparten av desse midlane gjeld private idrettsanlegg og desse søknadene vert administrativt handsama av Fjell idrettsråd. Driftskomitéen skal vurdera seks søknader om tilskot til vedlikehald av andre private kulturbygg.
Andre tilskot og stipend som skal fordelast på tysdag er tilskot til humanitære organisasjonar, tilskot til materiell og utstyr, tilskot til kunstnarleg verksemd, kulturstipend, elitestipend og idrettsstipend.
Komitéen skal også avgjera kven som får kulturprisen 2010. Det er kome inn seks forslag til denne prisen.
Stramt budsjett
Rådmannen legg fram ei svært stramt budsjettramme for 2011. Budsjettet er basert på ei vidareføring av aktivitetsnivået slik det er i dag. Budsjettet har ei underdekning på 17 millionar kroner. Rådmannen har dekka inn 10 millionar kroner ved bruk av disposisjonsfondet. Han legg dermed fram eit budsjett med eit usaldert underskot på sju millionar kroner.
Rådmannen meiner at budsjettbalansen må gjenopprettast i 2012 og at det må treffast strategiske tiltak som betrar balansen. Slike tiltak vil til dømes vera endring i skulestrukturen. Han vil ikkje tilrå nye tiltak i driftsbudsjettet eller i investeringsbudsjettet.
Handlingsprogrammet, økonomiplanen og årsbudsjettet skal handsamast i komité for drift, komité for finans- og forvaltning før formannskapet sender dokumenta på offisiell høyring. Budsjettet vert endeleg vedteke av kommunestyret 16.12.
Andre saker i komité for drift
Skule- og utdanningsplanen 2011-2014 ligg føre, og rådmannen føreslår at planen vert sendt ut på høyring. Tidlegare har skule- og utdanningsplanen først og fremst vore ein plan for skuleutbyggingar. Som følgje av at skulekapasiteten har betra seg, legg ikkje denne planen opp til vekst i tal av skular, med unnatak av straumeområdet der det er venta sterkt folkeauke.
Komité for drift skal vurdera trafikktryggleiken for elevar som nyttar ein sideveg på riksveg 555 mellom avkjørsla til Brattholmen og Krabbholmen. Dette er ei ulukkesbelasta strekning. I dag får elevar frå denne adressa fri skyss om morgonen ettersom det er vanskeleg å kryssa vegen i rushtida. Skulesjefen ber komitéen å vurdera om kryssing av riksvegen bør klassifiserast som særleg farleg eller vanskeleg.
Det føreligg møteplan for dei folkevalde for 2011. Rådmannen føreslår at kommunestyra frå nyttår av startar klokka 14.00 og vert avslutta innan klokka 20.00. For tida tek kommunestyra til klokka 17.00.
Tekst: Vigleik Brekke
