Fjell kommune skal om kort tid ta stilling til den største og mest kompliserte reguleringsplanen nokosinne.

Rådmannen legg no fram områdereguleringsplanen for Straume sentrum, og formannskapet skal komande måndag 6. juni gje si innstilling til kommunestyret.

Ordførar Eli Årdal Berland og plan- og utbygggingssjef Willy Sørensen ved opning av utstilling av planen 17.09.10
Ordførar Eli Årdal Berland og plan- og utbygggingssjef Willy Sørensen ved opninga av utstilling av planen 17.09.10

Planområdet er på 107 dekar og legg opp til ei samla utbygging på om lag 96 tusen kvadratmeter i tillegg til det eksisterande arealet på rundt 83 tusen kvadratmeter. Målet med planen er å skapa ein bystruktur og leggja til rette for nye og samansette funksjonar. Planen vert fremja av Fjell kommune og er utarbeidd i samarbeid med Sartor Holding.

Tre motsegn frå Fylkesmannen

Fylkesmannen har kome med tre motsegn til planen. Han kravde handelsanalyse og betre handtering av støy. Det ligg no føre handelsanalyse og endringar i føresegnene som sikrar betre støyskjerming, og dermed er det oppnådd semje om to av motsegnpunkta.

Men kommunen og Fylkesmannen har ikkje oppnådd semje om det tredje motsegnspunktet; parkeringsdekninga. Rådmannen har redusert talet på parkeringsplassar frå 3150 til 2750 og meiner at eit første byggjesteg bør gje rom for 1 500 parkeringsplassar. Sjølv om ikkje kommunestyret kan eigengodkjenna planen, legg rådmannen planen fram for kommunestyret. Dersom kommunestyret godkjenner planen, går han vidare til mekling og eventuell klage til Miljøverndepartementet.

Sentralt i sentrum vert den nye «Festplassen». Rådmannen ønskjer at dette vert ein plass og bygg med særskilte kvalitetar. Dette vert sikra med ein arkitektkonkurranse der utbyggjar og Fjell kommune saman utformar opplegg, program og omfang.


Tekst og foto: Vigleik Brekke