Vestlandet har eit stort utviklingspotensiale, og olje, gass og marin næring vil ha ei viktig rolle i framtida. Men skal ein lukkast med dette, må det leggjast til rette for kunnskapsmiljø og forsking.
Dette kom klart fram på eit SINTEF-seminar i Fjell rådhus fredag ettermiddag. Konsernsjef i SINTEF, Unni M. Steinsmo, stilte spørsmålet om Vestlandet kunne erobra havrommet.
- Vestlandet er god på innovasjon og verdiskaping. For å utvikla dette trengs det gode rammevilkår for å ta ut potensialet. Innovasjon handlar om utdanning, forsking og implementering, sa Steinsmo.
Konsernsjef i SINTEF, Unni M. Steinsmo
Konsernsjef i SINTEF, Unni M. Steinsmo
I foredraget fokuserte konserndirektøren på rammevilkåra.
-Det blir investert for lite i forsking, og samhandlinga mellom forsking og næringslivet må verta betre. Vestlandet treng forskingskompetanse, og viktige moment for å lukkast med dette er erfaringskompetanse, teknologisk utvikling, innovasjon, verdiskaping, samhandling og nettverk. Dette er mogleg å få til, sa konsernsjefen.
Kapplaup om teknologi
Ifølgje Unni Steinsmo gjer ny teknologi det mogleg å utvikla nye biokjemiske stoff og komponentar som kan brukast til tilsatsstoff i matproduksjon eller til utvikling av medisin. Ho viste til at vi er ein del av eit teknologikapplaup og at ingen investerer så mykje i dette som Kina.
- Dette er ei krevjande tid med stor omforming. Dersom vil skal sikra ei bærekraftig utvikling, må vi ta vare på miljøet, ha eit godt politisk leiarskap og forvalta ressursane på ein god måte, sa Unni M. Steinsmo.
Leiar for Bergens marine forskingsklynge, Øyvind Paasche, hadde temaet «Levende gullgruver på havets dyp». Ifølgje Paasche har dei store endringane i nordområda eit stort potensiale. Han synte til fleire døme på avansert forsking på mineral og bioprospektering under havet. Bergen marine forskningsklynge er eit forpliktende samarbeid blant sentrale aktørar innen marin forsking og utdanning i bergensregionen
Frå panelsamtalen
Frå panelsamtalen. Frå venstre: Trina Galloway, Jo Stein Moen, Unni M. Steinsmo og Øyvind Paasche
Ny biomarin industri
Forskingssjef i SINTEF, Trina Galloway snakka om nye biomarine næringar som dyrking av dyreplankton og mikroorganismar, tang og tare. Ho viste til dei nasjonale måla der eitt av måla er å oppnå 10 milliardar kroner i omsetnad innan ny biomarin industri. Norsk senter for tang- og tareteknologi vart opna i august i år og skal hjelpa til å etablera ei kompetanseplattform for utvikling av industriell dyrking, hausting, bearbeiding og bruk av tang og tare i Noreg.
Kommunikasjonssjef i Marintek, Jo Stein Moen, hadde temaet «Norsk teknologi og erobring av havrommet». Ifølgje Moen er målet å utvikla havromteknologi for industrielle aktørar i ein global marknad. - Innovasjon å gjenskapa gode prestasjonar, sa Moen.
Det var ordførar i Fjell, Eli Årdal Berland, som ønskte forsamlinga velkomen til Fjell.
- Dette er første gong SINTEF arrangerer eitt av desse seminara utanom Oslo, og eg er stolt over at selskapet legg eitt av desse seminara til regionen vår. Dette seminaret har likevel eit globalt blikk, sa Årdal Berland.
Det vert arrangert SINTEF-seminar fem gonger i året. Unni M. Steinsmo seier at ved å arrangera eit slikt seminar i Fjell kjem ein nærare næringsaktørane og dei som tek avgjerdene.
SINTEF har hovudkontoret i Trondheim. Selskapet har 2100 tilsette og har medarbeidarar i 67 land. SINTEF har eit partnarskap med Norges teknisk-naturvitenskapelige universitet (NTNU) i Trondheim og samarbeider med Universitetet i Oslo. Lokalt har kommunane Fjell, Sund og Øygarden avtale med SINTEF om utvikling og drift av næringsutvilingsselskapet Gode Sirklar.
Tekst og foto: Vigleik Brekke
