Statens vegvesen har nyleg gjennomført kontroll av betongen i Bjorøytunnelen. Overingeniør i Statens vegvesen, Åge Hagesæther, opplyser at dette var ein generell kontroll for å få undersøkt kvalitéten på betongen i tunnelen.
Vegvesenet nytta høvet til å gjennomføra denne kontrollen no ettersom om lag 80 meter av duken i tunnelen vart fjerna i samband med arbeidet med utdjupinga av Vatlestraumen.
- Det ser ikkje ut til at kvaliteten på betongen i tunnelen er svekka, og det er ingenting som tyder på at det er nødvendig å gjera noko med tunnelen no, seier Hagesæther.
Hagesæther opplyser at duken i tunnelen vert sett på plass så snart dei endelege resultata av prøvane av betongen ligg føre. Dette vil truleg skje i løpet av august. Han opplyser elles at saltet i vegbana er spylt vekk.
Tekst: Vigleik Brekke
