Fjell kommune har starta opp arbeidet med kommunedelplan for trafikksikring 2012-2015/2020. Før skrivearbeidet tek til for alvor, ønskjer samfunnsplan hjå Plan- og utbyggingssjefen innspel.

- Vi ønskjer informasjon og synspunkt om forhold som påverkar trafikktryggleiken i Fjell før planarbeidet tek til for alvor. Innbyggjarane får på denne måten koma med forslag som kan leggja føringar for kva som skal stå i planen, seier samfunnsplanleggjar Marit Sigurdson.

 Trafikksikring Storskaret - Brattholmen. Vegen vart offisielt opna i desember 2010. Trafikksikring på strekninga Storskaret - Brattholmen. Vegen vart offisielt opna i desember 2010.

Planen vert nytta til å prioritera bruken av kommunale løyvingar til trafikksikringstiltak og er grunnlaget for statlege og fylkeskommunale prioriteringar. Planprogrammet for kommunedelplanen vart vedteke i komité for drift 8. november. Kirsten Syljeset (H) er saksordførar. Ei arbeidsgruppe har ansvar for det faglege innhaldet i planen. Det vert folkemøte i mars, og det er venta at planutkastet vert sendt ut på høyring før sommarferien 2012. Fristen for å koma med innspel i denne omgangen er 13. januar 2012.

- Både enkeltpersonar, organisasjonar, lag, skular og andre kan koma med innspel. Det kan handla om vegstrekningar som kan gje utrygge og farlege situasjonar og andre forhold knytt til trafikksikring, seier Marit Sigurdson.

Trafikksikringsplanen har fått eiga side på heimesida til Fjell kommune. Her er det eige skjema for innspel og meir informasjon om korleis du kan gå fram for å senda inn synspunkt på planen.

Tekst: Vigleik Brekke