Formannskapet skal måndag 13. februar ta stilling til framlegget til endeleg reguleringsplan for sambruksfelt på riksveg 555 mellom Straume og Knarrvika.
Riksveg 555 i dag
Riksveg 555 i dag
Kommunestyret vedtok 24. november i fjor å senda saka tilbake til formannskapet for ny behandling. Bakgrunnen var at på det tidspunktet var det nødvendig å få avklart spørsmål knytt til parkering.
Planen omfattar ei strekning på 1,8 kilometer og legg til rette for å utvida riksveg 555 frå to til fire felt der to av felta er reservert for kollektivtrafikk. Det var også i utgangspunktet regulert inn innfartsparkering på den såkalla "McDonald-tomta". Denne delen av planen (innfartsparkering og austre rundkjøring) er no trekt ut av planen.
Rådmannen skriv at dei samla konsekvensane er gjennomgåande vurdert som positive i forhold til situasjonen i dag. Saka vert endeleg avgjort av kommunestyret.
Planprogram for plan for bustadutvikling
Utkastet til planprogram for kommunedelplan for bustadutvikling 2013-2020 har lege ute til offentleg ettersyn i åtte veker. No er planprogrammet klar for behandling i formannskapet. Det er kome inn 13 innspel til planen. Sju av innspela omhandlar konkrete areal og vert vurderte som relevante for dette planarbeidet. Tre av innspela tek opp ulike problemstillingar, medan tre av innspela gjeld medverknad i planarbeidet.
Rådmannen føreslår at det vert etablert to arbeidsgrupper. Grunna "Attraktiv bustadkommune" skal utarbeida framlegg til visjonar, mål og tiltak for å utvikla Fjell til ein attraktiv bustadkommune. Gruppa for "Bustadsosiale behov og utfordringar" skal gjennomgå og vurdera kommunen si organisering av bustadsosialt arbeid. Formannskapet er styringsgruppe for planen, medan Marianne Sandahl Bjorøy (ap) er valt som saksordførar.
Andre saker/orienteringar i formannskapet
- Innspel til høyring på Planprogram for regional næringsplan 2013-2017
- Drøftingssak om framdriftsplan for behandling av Sotrasambandet
- Orientering om Eideplanen
Her kan du lesa innkalling med saksdokument.
Telst: Vigleik Brekke
