Komité for plan og utvikling skal på møtet tysdag 17. januar ta endeleg stilling til ein omfattande reguleringsplan for Kolltveit vest. Planen legg til rette for 373 bustader av variert storleik.
Planen omfattar også ny barnehage, eksisterande industriområde og kulturminne. Planområdet ligg mellom Kolltveit og Blommen, om lag tre kilometer vest frå Straume og to kilometer nord for Fjell gard.
Omriss av planområdet
Omriss av planområdet
Rådmannen tilrår å godkjenna planen, men har lagt inn nokre endringar etter at planframlegget låg ute til offentleg ettersyn hausten 2010. I føresegnene føreslår rådmannen mellom anna at det vert lagt inn rekkjefølgjekrav om vassforsyning og avlaup. Det vert lagt inn krav om at tilfredsstillande anlegg/infrastruktur knytt til vassforsyning og avlaup skal vera utbygt, og det skal dokumenterast at det er tilstrekkeleg kapasitet til å levera sikker vassforsyning og at avlaupsanlegga tilfredsstiller krava til bortleiing/reinsing.
Kommunestyret tek endeleg stilling til planen.
Plan for Blommen, Nordre Fjell
Reguleringsplan for Blommen (Nordre Fjell) ligg også klar til sluttbehandling. Planen legg til rette for 48 nye bustadeiningar og infrastruktur. Rådmannen tilrår at kommunestyret godkjenner planen med dei endringar som går fram av saksutgreiinga. Det er mellom anna lagt inn rekkjefølgjekrav om gang- og sykkelveg og vassforsyning og avlaup.
Andre reguleringsplanar
Plan for Ebbesvika
Formålet med planen er å leggja til rette for barnehage og bustader med infrastruktur. Rådmannen føreslår at reguleringsplan for Ebbesvik vert lagt ut til offentleg ettersyn med nokre justeringar. Det vert ikkje teke stilling til omdisponering av LNF-område til bustader.
Plan for Flyndrevika
Planforslaget opnar for 79 bustadeiningar (30 eigebustader og 49 konsentrerte bustader) i tillegg til fellesareal, leikeplassar, parkering og friluftsområde. Det er gjort nokre endringar i planen, og rådmannen går inn for at planen vert lagt ut til offentleg ettersyn.
Etablering av byggjevareforreting på Straume sør
E.A. Smith ønskjer å etablera byggjevareutsal i tilknyting til verksemda på Søre Straume. Rådmannen går inn for å gje dispensasjon frå arealbruken til føresegnene i reguleringsplan for Straume sør.
Her kan du lesa innkalling med saksutgreiing.
Tekst: Vigleik Brekke
