Formannskapet vedtok i går (23.11) å leggja tre forslag til budsjett og økonomiplan ut på høyring. I komité for finans og forvaltning i sist veke presenterte fleirtalskonstellasjonen (Frp, Høgre og KrF) og Arbeidarpartiet forslag til årsbudsjett og økonomiplan for 2011-2014.

På møtet i går presenterte også Anita Heggholmen (uavhengig) forslag til budsjett på vegne av tidlegare Sotralista-representantar. Driftsbudsjettet i Fjell har for 2011 ei ramme på om lag 1,2 milliardar kroner. Handlingsprogram, økonomiplan og årsbudsjett vert endeleg vedteke av kommunestyret 16. desember.

Planprogram for Fjell festning

Formannskapet går inn for at det vert starta opp strategisk plan for Fjell festning leia av Rådmannen ved kultursjefen. Det utvida formannskapet vert føreslått som politisk styringsgruppe. I innstillinga frå formannskapet går det fram at det også skal utarbeidast vernebruksplan og områdereguleringsplan for området. Saka vert endeleg avgjort av kommunestyret.

Formannskapet godkjente at FjellVar byggjer ut trykkaukestasjon på Møvika. Saman med trykkaukestasjonen på Nybø (Fjell), vil trykkaukestasjonen på Møvika gje sikrare vassforsyning på strekninga Møvika, Fjell, Bildøy og Litlesotra. Prosjektet har ein kostnad på om lag 2,3 millionar kroner.

Tekst: Vigleik Brekke