Tysdag 6. desember er det møte i både komité for drift (KD), komité for finans og forvaltning (KFF) og komité for plan og utvikling (KPU). KFF startar med behandlinga av saker klokka 16.00, medan KD og KPU startar med sjølve sakene litt seinare på ettermiddagen på grunn av omvisning, orienteringar og opplæring.

KFF: Drøftar turveg mellom Foldnes og Hjelteryggen

Komité for finans og forvaltning skal drøfta planar om turveg mellom Foldnes og Hjelteryggen. Denne saka har strekt seg over to tiår, og i økonomiplanen er det sett av 1,5 millionar kroner til oppstart av prosjektet. For å realisera etappe 1 (Foldnes kyrkje - Larslivatnet) og etappe 1a (avstikkar til Arefjordpollen) er det behov for inntil 2,3 millionar kroner utover tidlegare avsette pengar.

Planlagt turveg mellom Foldnes og Hjelteryggen
Planlagt turveg mellom Foldnes og Hjelteryggen

Totalt har prosjektet tre etappar. Det er planlagt ein grusveg med ein breidde på tre meter og veglys med 35 meter avstand mellom mastene. Saka vert lagt fram utan tilråding. Rådmannen minner likevel om at det i liten grad er ønskjeleg å opna for nye prosjekt som aukar investeringsnivået.

Andre saker i KFF

• Sertifisering av verksemder som miljøfyrtårn (utsett sak frå 15.11.).
• Kommunal garanti for lån på 150 millionar kroner (FjellVAR) som skal finansiera investeringar i nye prosjekt i perioden 2011-2013.
• Bygging av lagerbygg på gjenbruksstasjonen på Straume (FjellVAR).

KD: Sluttbehandling av plan for idrett og fysisk aktivitet

Komité for drift skal på møtet 6. desember gje innstilling til kommunedelplan for idrett og fysisk aktivitet 2011-2018 «Alle i aktivitet». Denne planen er eit overordna politisk styringsdokument innan område idrett og fysisk aktivitet og skal vera styrande for samarbeidet mellom kommunen og dei frivillige organisasjonane. Planen legg til rette for at folk kan vera fysisk aktive, uansett alder, kjønn, funksjonsnivå og sosial bakgrunn. Det er særleg lagt vekt på eit aktivt friluftsliv ettersom dette vert rekna som eit lågterkseltilbod som alle kan ta del i. Kommunestyret gjer endeleg vedtak.

Reviderte retningslinjer for utleige av Fjell kulturhus

Noverande retningslinjer har ikkje vore reviderte sidan kulturhuset var nytt. Rådmannen føreslår å vidareføra ordninga med at lag og organisasjonar kan leiga kultursalen med unnatak av leige til framsyningar/arrangement der laget har billettpris. Det ligg føre forslag til nye leigeprisar, både for leige av lokale og leige av AV-utstyr. Rådmannen skriv i saka at sjølv om prislista no vert justert, har Fjell framleis låg leigepris samanlikna med andre kommunar.

Andre saker i KD

• Høyring til forslag om endringar i opplæringslova om lærartettleik. Regjeringa føreslår å lovfesta nasjonale reglar og presenterer to modellar. Den eine modellen er lovfesting av lærartettleik på den
  enkelte skule, medan den andre modellen lovfestar gjennomsnittleg lærartettleik i den enkelte kommune.
• Årleg rullering av kommunedelpan for idrett og friluftsliv; søknader om spelemidlar for tildelingsåret 2012.
• Tilstandsrapport for grunnskulen i Fjell (referatsak)
• Statusmøte mellom Ungdommens kommunestyre (UKS) og KD

KPU: Plan for Snekkevika/Brattholmen

Komité for plan og utvikling skal på tysdag ta stilling til om ein reguleringsplan for Snekkevika/Brattholmen skal leggjast ut til offentleg ettersyn. Framlegget legg opp til utviding av skulebygg i Brattholmen, seks bustadtomter, kai, friområde, åtte båtplassar og infrastruktur. Planen sikrar nødvendig areal til utviding av Brattholmen skule og ein ny og betre tilkomst for dei som bur på Langholmen. Rådmannen meiner at framlegget til detaljreguleringsplan er eit kompromiss mellom vern av strandsona og grunneigar sine behov.

Krav om sikring av skjering

Rådmannen går inn for at Husbyggernes Innkjøpskontor vert pålagt å sikra ei fjellskjering ved ein bustad på Fjell. Det er innstilt på at skjeringa vert sikra med korrosjonsverna steinsprangnett. Frist for utføring av tiltaket er sett til tre månader. Husbyggernes Innkjøpskontor er også tidlegare pålagt å sikra fjellskjeringa. Saka vart utsett for synfaring i KPU 8. november.

Andre saker i KPU

• Klage på kommunestyret sitt vedtak om godkjenning av reguleringsplan for utviding av Kleivane kyrkjegard. Det føreligg seks andre klagesaker.
• Reguleringsendring for ny offentleg veg mellom Straume Næringspark og Ebbesvika.
• Førespurnad om reguleringsendring frå fritidsbustad til bustad, Anglavika.

Tekst: Vigleik Brekke