Komité for plan og utviking skal på møtet tysdag 7. februar gje innstilling til Kystverket sin søknad om løyve til å sprengja ut 65 tusen kubikk i Vatlestraumen ved Bjorøyna.

I utgangspunktet er rådmannen positiv til at tiltaket vert gjennomført. Han legg likevel saka fram utan innstilling. Saka vert endeleg avgjort av kommunestyret.

Skal auka tryggleiken for skipsfarten

Utbetringa skal auka tryggleiken for skipsfarten i Vatlestraumen. Topografien og straumforholda i området er utfordrande, og navigatørar må gjera fleire store kursendringar innanfor eit kort tidsrom i det tronge farvatnet. Grunnflaket skal sprengjast ned frå ni til 14 meter. Bjorøytunnelen ligg i området, og den næraste sprenginga skjer om lag 65 meter frå tunnelen.

Fjell kommune har i fleire møte med Kystverket reist spørsmålet om det økonomiske ansvaret dersom Bjorøytunnelen vert langvarig stengt som følgje av sprengingsarbeidet. Alle beredskapsaktørane er i fellesskriv informerte om at Kystverket tek på seg kostnadene ved ei eventuell langvarig tunnelstenging.

Utdjupinga av Vatlestraumen vil etter planen starta opp i vår etter at kommunestyret har gjort endeleg vedtak. Arbeidet er venta å ta om lag fire månader, og sprenging skal skje mellom klokka 10.00 og 14.00 måndag til fredag. Tunnelen vert stengt i inntil eín time ved kvar sprenging.

Kystverket har utarbeidd ein eigen informasjonsstrategi som sikrar gode rutinar for varsling og informasjon under anleggsperioden. Fjell kommune har utarbeidd ein beredskapsplan for eventuell langvarig stenging av Bjorøytunnelen. Etter avtale med Sund kommune omhandlar planen både Bjorøyna (Fjell kommune) og Tyssøyna (Sund kommune).

Andre saker i KPU 7. februar

• Reguleringsplan for Spjeld
• Førespurnad om regulering Ebbesvikneset
• Seks klagesaker

Her kan du lesa innkalling med saksdokument til møtet. Møtet tek til klokka 16.00 og vert halde i kultursalen i rådhuset.


Tekst: Vigleik Brekke