Statens vegvesen går inn for at nytt sotrasamband vert bygt med bru med fire felt i høgspenttraséen (konsept F) mellom Sotra og fastlandet.
Prosjektleiar i Statens vegvesen, Magnus Natås, sa dette då han i Fjell rådhus i ettermiddag presenterte kommunedelplan med konsekvensutgreiing for riksveg 555 fastlandssambandet Sotra-Bergen. Denne planen omfattar strekninga mellom Kolltveit og Storavatnet. Vegkontoret arbeider også med planområdet mellom Storavatnet og Liavatnet som ein eigen plan.
Ordførar Eli Årdal Berland og prosjektleiar Magnus Natås under presentasjonen av planen i dag
Ordførar Eli Årdal Berland og prosjektleiar Magnus Natås under presentasjonen av planen i dag
I tillegg til firefeltsbru i høgspenttraséen, har vegkontoret også vurdert alternativet med å byggja ei ny bru med to felt like nord for eksisterande bru (konsept J), men vil ikkje tilrå denne løysinga.
-Konsept J gjev ikkje tilfredsstillande løysing med omsyn til å betra transportkapasiteten, god og sikker framkomst for alle trafikkgrupper og meir robust og fleksibelt transportsystem. Statens vegvesen vil difor sterkt rå frå alternativ J i den vidare planlegginga, heiter det i tilrådinga.
Konsept J er kostnadsrekna til om lag 3,3 milliardar kroner, medan konsept F er rekna til å kosta mellom 5,1 og 5,6 milliardar kroner.
Brukryssing mellom Sotra og Bergen sett frå Sotrasida
Brukryssing mellom Sotra og Bergen sett frå Sotrasida
Tilrår miljøtunnel forbi Straume
På strekninga mellom Kolltveit og Arefjord har vegkontoret vurdert både ein firefeltsveg under og utanom Straume (C101) og ei løysing med firefeltsveg gjennom Straume med miljøtunnel (C102). Her tilrår vegkontoret alternativ C102 med miljøtunnel forbi Straume sentrum. Dette vert mellom anna grunngjeve med at C102-alternativet har mindre inngrep i terrenget.
Lang tunnel kostar 600 mill. ekstra
På strekninga mellom Arefjord og Storavatnet er det også to alternative traséar. Alternativ C7/C9 går i tunnel frå Arefjord, via fire-felts bru om lag 400 meter sør for eksisterande bru. Frå brufestet på bergenssida går det ein kort tunnel som deretter følgjer eksisterande veg i fire felt til Storavatnet. Det andre alternativet (C7) har lang tunnel frå brufestet i Drotningsvik fram til krysset ved Storavatnet. På denne strekninga gjev ikkje vegkontoret tilråding og syner til at her må ein vega omsynet til nærmiljøet opp mot anleggskostnaden. Løysinga med lang tunnel (to kilometer) vil kosta om lag 600 millionar kroner meir enn alternativet med kort tunnel.
Saka står på sakskartet i Fjell formannskap 27. februar med sikte på at planen vert vedteken lagt ut til offentleg høyring i seks veker. Det er Statens vegvesen som administrerer høyringa.
Framlegget til Nasjonal transportplan (NTP) vert lagt fram av Vegdirektoratet 29. februar. Målet er at Bergen og Fjell kommunar gjer endeleg vedtak for kommunedelplanen slik at fylket kan gje uttale til NTP på fylkestingsmøtet 12. juni. NTP er klar for endeleg behandling i Stortinget våren 2013.
Tekst og foto: Vigleik Brekke
