I går (17. januar) var det møte i komité for finans og forvaltning og komité for drift.

Komité for finans og forvaltning går samrøystes inn for å godkjenna plangrunnlaget for eit lokalmedisinsk senter på Straume. Komitéen går også inn for at rådmannen får fullmakt til å engasjera arkitekt slik at det kan utformast eit skisseprosjekt for senteret. Dersom dette prosjektet vert realisert, vert dette den største investeringa i denne kommunevalperioden. Saka går vidare til avgjerd i kommunestyret.

Det nye senteret er planlgt plassert i området mellom Straume terapisenter og Øyane DPS
Det nye senteret er planlagt plassert i området mellom Straume terapisenter og Øyane DPS

Dette lokalmedisinske senteret er eit samhandlingsprosjekt i samarbeid med Helse Bergen og kommunane Askøy, Fjell, Sund og Øygarden. Dersom alt går etter planen, kan senteret stå klar til bruk i 2015. På møtet i går var det spørsmål om senteret vil gje tilbod om røntgen. Spesialrådgjevar Svein Fjelland oppyste at det er dialog med både Helse Bergen og Helse Vest, og det kan verta aktuelt å få på plass eit privat røntgenttilbod, men at dette no er uavklart.

Det lokalmedisinske senteret er ei fullføring av samhandlingsprosjektet "Betre saman". Helse Bergen og kommunane Askøy, Fjell, Sund og Øygarden har allereie etablert intermediær avdeling på Straume med seks senger som eit pilotprosjekt til det lokalmedisinske senteret. Alle kommunane har gjeve eit mandat til ei prosjektgruppe som skal følgja opp pilotprosjektet og planleggja innhald og organisering av eit lokalmedisinsk senter på Straume.

Det nye senteret vil innehalda ei rekkje funksjonar. Aktuelle funksjonar er 10 senger til restbehandling av pasientar overførte frå sjukehus, to-tre observasjonssenger, 10 rehabiliteringssenger og 16 dagplassar til rehabilitering. Det er også aktuelt å gje plass til eit frisklivs- og meistringssenter, dialysesatellitt, 20 sjukeheimsplassar (Fjell kommune), legesenter og den interkommunale legevakta for Sund og Fjell. Det er ikkje avklart om det vert etablert røntgenteneste og bynær fødestove i senteret.

Komité for finans og forvaltning gjekk også inn for å godkjenna fleire samhandlingsavgtalar mellom Helse Bergen og Fjell kommune. Komitéen går også inn for at kommunen sluttar seg til eit felles grunnlagsdokument for samarbeidet mellom Helse Bergen, Haraldsplass og dei 22 kommunane i lokalsjukehusområdet.

Val av barnehageutval og arbeidsgruppe for ny skulestruktur

Både komité for drift og komité for finans og forvaltning vedtok at det skal opprettast eit nytt barnehageutval og at det skal etablerast ei arbeidsgruppe som skal utgreia skulestrukturen i Fjell kommune og vurdera plassering av ny skule i området Skålevik, Sekkingstad og Eide.

Etter at komitéane i går valde inn sine representantar, vert utvalet og arbeidsgruppa samansett slik:

Barnehageutvalet:

• Leiar: Vidar Arnesen (FrP) med Tore Lønøy (FrP) som personleg varamedlem
• Nestleiar: Elna Nybakk (SL) med Jarle Syltøy (SL) som personleg varamedlem
• Cecilie Rathem (H) med Britt Hjørdis Svendsen (FrP) som personleg varamedlem
• Jan Arne Karlsen (Ap) med Espen Elstad (V) som personleg varamedlem
• Johnn R. Hardang (KrF) med Liv Urhaug (KrF) som personleg varamedlem

Arbeidsgruppa for ny skulestruktur

• Leiar: Kirsten Syljeseth (H) med Elisabeth Sandvik (H) som personleg varamedlem
• Nestleiar: Sveinung Vethe (Ap) med Gunnar Hannisdal (Ap) som personleg varamedlem
• Ann-May Aase (FrP)) med Britt Svendsen (FrP som personleg varamedlem
• Cecilie Rathem (H) med Harald Ruud (KrF) som personleg varamedlem
• Jarle Syltøy (SL) med Tove Iren Vindenes (SL) som personleg varamedlem

Andre saker i komité for finans og forvaltning

• Handlingsplan for komitéen
• Oreigning til gjennomføring av reguleringsplan, Haganes. Komitéen avslo søknaden om oreigning av veggrunn og rettar til gjennomføring av reguleringsplanen.
• Høyring av framlegg til lov- og forskriftsføresegner om foreldrebetaling i ikkje-kommunale barnehagar: Komitéen ber departementet å vurdera om endeleg klagebehandling i kommunestyret eller ei klagenemnd er ei meir tenleg løysing enn at Fylkesmannen er klageinstans.
• Folkevaldopplæring: Komitéen føreslår at det vert sett opp ein ny «heildag» for opplæring som erstatning for nokre kveldssamlingar.

Andre saker i komité for drift

• Statusmøte mellom Ungdommens kommunestyre (UKS) og komité for drift: To representantar frå UKS orienterte om det politiske arbeidet i UKS
• Retningslinjer for reduksjon/fritak for foreldrebetaling av barnehageutgifter
• Handlingslplan for komité for drift
  

Tekst: Vigleik Brekke