Komité for finans og forvaltning vil ikkje på dette tidspunktet ta stilling til forslaget om å leggja to skular og to eigedomar ut for sal.

På møtet i går vart det vedteke å senda saka tilbake til administrasjonen og få utgreidd om kommunen sjølv kan nytta eigedomane til ulike typar bustader. Det var gamleskulane på Fjell og Knappskog og tomteområde på Bildøyna og Sprenghaugen i Møvika-området som var aktuelle for å leggja ut for sal i den opne marknaden.

Nei til samanslåing av komitéar

Med sju (FrP, Høgre, KrF og Venstre) mot to røyster (Ap) gjekk komité for finans og forvaltning inn for å oppretthalda tre komitéar (komité for drift, komité for finans og forvaltning og komité for plan og utvikling). Komitéen ønskjer også å oppretthalda det politiske arbeidsutval. Formannskapet skal ha 11 faste representantar med varamedlemer. Komitéen går vidare inn for at den politiske styringsmodellen skal evaluerast i løpet av komande kommunestyreperiode. Mindretalet (Ap) røysta for rådmannen si innstilling som mellom anna innebér samanslåing av komité for drift og komité for forvaltning. Innstillinga frå komité for drift samsvarar med innstillinga frå komité for drift og komité for plan og utvikling.

Overfører båt til Stiftinga Langøy

På møtet i komitéen i går vart det samrøystes vedteke å overføra fritidsbåten "Sun Buster" , vederlagsfritt til Stiftinga Langøy.

Langøy kystkultursenter
Langøy Kystkultursenter

Fjell kommune eig båten, men inngjekk i 2005 ein mellombels avtale med Stiftinga Langøy om overdraging av båten til stiftinga. Stiftinga har hatt ansvaret for vedlikehald og forsikring av båten. Fram til 2010 har Stiftinga Langøy fått ei årleg løyving frå kommunen som har dekt kostnader med båten. Ettersom kommunen ikkje løyver pengar i 2011, har stiftinga stilt spørsmål om kommunen kan dekkja utgiftene med båten eller eventuelt overdra båten permanent til stiftinga. Komitéen støttar innstillinga frå rådmannen om at ei permanent vederlagsfri overdraging er den beste løysinga.

Andre saker i komité for finans og forvaltning

• Endring av garanti på lån teke opp av Fjell bustadstifting: Komité for finans og forvaltning går inn for at Fjell kommune endrar garanti for lån Fjell bustadstifting har teke opp frå simpel garanti til sjølvskuldnargaranti. Endringa vil gje betre rentevilkår for bustadstiftinga.
• Endring av rutinar for behandling av klagesaker.
• Høyringsuttale om endring i rekneskapsføring av pensjon.
  
  

Tekst: Vigleik Brekke