Avløysarordningane er ein del av velferdsordningane i landbruket.

Tilskott kan gjevast til avløysing ved:

• ferieavvikling
• sjukdom
• svangerskap/fødsel/adopsjon
• følgje av sjukt barn til behandling
• dødsfall i nær familie

Tilskottet kan gjevast for å dekkje faktiske utgifter til lønn, feriepengar, arbeidsgjeveravgift og avgiftspliktig køyregodtgjersle til avløysaren. Avløysaren må vere minst 16 år og kan ikkje ha næringsinntekt frå føretaket eller vere ektemake/sambuar til ein som har næringsinntekt frå føretaket. 

Landbruksføretak

Tilskot kan gjevast føretak som driv vanleg jordbruksproduksjon dersom verksemda er registrert i Einingsregisteret og 

• er registrert som meirverdiavgiftspliktig og kan levere årsoppgåve som landbruksføretak, eller
• har hatt ei samla omsetning og uttak av avgiftspliktige varer og tenester på til saman minimum kr 20 000 i løpet av dei siste 12 månadene før registreringsdato

Du kan fylle ut eit eige søknadsskjema fastsett av Statens landbruksforvaltning (sjå nedanfor). Skjemaet kan du også få ved å vende deg til kommunen.

Avhengig av kva for type avløysing det er snakk om, sjå forskrift om tilskott til avløysing under Lover og retningsliner.

Frist for søknad om tilskott til avløysing ved ferie og fritid er 20. januar året etter at avløysinga har skjedd. Ved langvarig sjukdom eller ved svangerskap/fødsel kan ein søkje så ofte søkjaren ønskjer det, f.eks. kvar andre månad. Den seinaste fristen for å levere søknader er tre månader etter den siste dagen i søknadperioden som gjev rett til tilskott. For nærmare avklaring, kontakt kommunen.

Kommunen vil behandle saka så snart som mogleg. Dersom saka ikkje kan avgjerast innan éin månad, skal du ha skriftleg svar om årsaka til det, med opplysningar om når ein ventar at vedtaket vil bli gjort.

Søknad sendast til kommunen, som gjer vedtak i saka. Tidspunkt og retningsliner for utbetaling av tilskottet - sjå søknadsskjemaet, ev. ta kontakt med kommunen.

Du kan klage på vedtaket innan ein frist på tre veker frå du mottok vedtaket. Klaga sender du til den instansen i kommunen som har gjort vedtaket. I klaga skal du føre opp kva du ønskjer endra i vedtaket og grunngje det. Kommunen vil kunne gje deg rettleiing. Klageinstans er Fylkesmannen. Før klaga blir sendt dit, skal den instansen i kommunen som gjorde vedtaket, vurdere om det er grunn til å endre det. Dersom vedtaket blir ståande, vil saka bli sendt til Fylkesmannen for klagebehandling.