Flyktningar som bur i kommunen, har rett til helsetenester på same måten som andre som bur i kommunen. Ved ankomst til kommunen skal dei få tilbod om helsesamtale og gratis undersøking hjå lege og tannlege.

Helsetilbodet i kommunen skal òg sørgje for at asylsøkjarar som bur eller har tilhald i kommunen, får nødvendig somatisk og psykisk helsehjelp.

Flyktningar og asylsøkarar

Innafor denne gruppa skal følgjande personar få spesiell merksemd og oppfølging:

• barn og unge - særskild dei som kjem aleine til Noreg
• einslege personar - utan familienettverk
• einslege forsørgjarar
• gravide
• kvinner som har vore utsette for valdtekt og anna seksualisert vald
• personar frå område der det er høg risiko for særskilde infeksjonssjukdommar
• personar som har vore utsette for tortur og anna alvorleg psykisk eller fysisk traumatisering 

For personar under 18 år er det ikkje eit vilkår at personen har lovleg opphald. For personar over 18 år utan lovleg opphald gjev lova rett til akutt helsehjelp.

Tenestene er gratis, med mindre det følgjer av lov eller forskrift at ein skal betale eit vederlag.

Kommunen vil sjølv sørgje for at nytilkomne flyktningar  får tilbod om helsetenester, og det er difor ikkje nødvendig å søkje om denne tenesta.

Tuberkuloseundersøking:                                                                                

Flyktningar, asylsøkarar og andre personar frå land med høg førekomst av tuberkulose, og som skal opphalde seg i Noreg i meir enn 3 månader, har plikt til å gjennomgå tuberkuloseundersøking innan 14 dagar etter innreise. Det inneber tuberkulintest (mantoux) og/eller lungerøntgen, etter gjeldane retningslinjer.

Dersom du meiner du ikkje får nødvendig helsehjelp frå kommunen, kan du etter kommunehelsetenestelova klage over dette til kommunen, og deretter til Helsetilsynet i fylket. I klagen må du greie ut om kva forhold det er du klagar over. Du bør beskrive kva du ønskjer endra, og grunngje dette. Kommunen vil kunne rettleie deg. Klagen blir send den instansen i kommunen som har behandla saka. Dersom kommunen held fast ved avgjerda si, blir klagen send vidare til Helsetilsynet i fylket.

Som mottakar av helsetenester kan du etter pasientrettslova også klage til Helsetilsynet på sjølve utføringa av tenesta. Klagen skal først sendast kommunen eller direkte til tenesteytaren slik at det skal vere mogleg å løyse saka på det lågaste nivået.